Siglir tar il cuntegn

Header

cuntegn

Cape Epic 2022 In'emna dira per Schurter e Forster

Nino Schurter e Lars Forster han terminà il Cape Epic, la cursa da set etappas da mountainbike en l’Africa dal Sid, be sin il 9avel plaz. Ils dus svizzers dal team Scott-Sram che avevan gudagnà questa cursa il 2019 e che valevan er quest onn tranter ils gronds favurits han la finala pers bunamain in’ura sin ils victurs, il duo tudestg cun Georg Egger e Lukas Baum.

Defects e crisas

Al duo Schurter e Forster n’èsi betg ì sco giavischà, quai davent dal cumenzament. En l’emprima etappa èn els vegnids franads da plirs defects, pli tard è Lars Forster cupitgà grev ed n’ha er betg gì la furma per triumfar a questa cursa da prestige che vala sco la pli dira cursa da mountainbike insumma. Tuttina èsi reussì al duo svizzer da gudagnar almain in’etappa. E l’etappa finala han els terminà sin il segund plaz.

Duo grischun al Cape Epic

Stà a la partenza al Cape Epic è quest onn er Andrin Beeli da Sagogn. El è partì ensemen cun Severin Disch da Tavau. Ils dus Grischuns han terminà la cursa da set etappas sin il 26avel plaz cun in retard da tschintg uras e mesa.

En duas emnas (8-10 d’avrigl) spetga sin Nino Schurter e Lars Forster l’emprima cursa da la cuppa mundiala en questa stagiun, quai a Petrópolis en la Brasilia.

Novitads 21:00

Artitgels legids il pli savens