Per Carlo Janka èsi la 17avla stagiun en la cuppa mundiala ch'el vul laschar cumenzar ils 18 da december cun la cursa rapida sin la pista Saslong en Val Gardena. Quella cursa duai mussar tge ch'è pussaivel, tge che ses dies, che fa dapi onns e continuadamain problems, lubeschia. Pli lunsch na vul e na sa Carlo Janka betg planisar. Da quella cursa dependia, tge finamiras pli pitschnas ch'el possia insumma anc metter quest enviern. Las preparativas durant la stad e l'atun èn stadas tut auter ch'optimalas. Sin la naiv ha il campiun mundial ed olimpic gì gnanc 10 dis trenament. Ses chau veglia bler dapli che quai che ses corp, e surtut ses dies, laschian far. Chapibel che Carlo Janka n'ha sut questas circumstanzas betg grondas spetgas en questa stagiun da la cuppa mundiala.
Quant ditg anc?
Cun sia vegliadetgna da 35 onns vegnia la dumonda quant ditg anc automaticamain. Cunquai ch'el n'haja betg pudì sa preparar uschia sco necessari sin la nova stagiun, sa tschentia era la dumonda sche quai bastia insumma per pudair tegnair pitg almain in pau. Cun la dumonda da terminar sia carriera vegnia el a stuair s'occupar en intgins mais. Uss vul Carlo Janka sa focussar sin la cursa rapida a Val Gardena. Pli lunsch na planisescha el betg. Ses corp vegn a mussar tge e quant ch'è pussaivel. Cumprovar na sto el nagut a nagin. Carlo Janka ha gudagnà tut en sia carriera. Sper titels e medaglias a gieus olimpics ed a campiunadis mundials è il skiunz da Sursaissa l'ultim Svizzer ch'ha gudagnà il classament general da la cuppa mundiala e la culla da cristal gronda (stagiun 2009/10).
