Dar in gieu dal campiunadi durant l'emna saja per sia equipa ina chaussa nunpussaivla. Uschia il trenader dal CB Lumnezia, Giacun Vinzens. Ils blers da ses giugaders lavuran u studegian ed èn l'emna ora en la Bassa. In'autra raschun ch'ins ha fatg valair il dretg da spustar il gieu da mardi-saira a chasa encunter Tusaun-Cazas, ch'il plaz a Vella na po betg vegnir illuminà. Suenter che Tusaun aveva gia baud annunzià da na pudair dar, sco il rest da la liga, l'emprim gieu dal nov campiunadi l'ultima fin d'emna, ha la Federaziun da ballape da la Svizra orientala fixà il nov termin durant l'emna. Uss vegn era quest stuschà ed insacura durant quista runda d'atun èsi da far ina terza emprova. Uschia ch'ils Lumnezians cumenzan la nova stagiun pir dumengia. Era a chasa, encunter Valposchiavo (29-08-2021; 15:00 uras).
I vegn grev da sa far valair en terza liga
Suenter dus onns è il CB Lumnezia enavos en 3. liga. Turna cun ils medems problems ch'han dà da morder era las ultimas stagiuns en 4. liga. Trenader Giacun Vinzens sto vegnir a frida cun in cader fitg pitschen cumpareglià cun tschellas equipas. Giuvens na vegnan suenter blers, 3 giugaders da tschep èn blessads ed il capo-tiragols Yannik Demont ha chalà. Malgrà questas difficultads, era gia ils onns passads, èn ils Lumnezians adina sa tegnids davantvart en la tabella. Tge ch'è in mussament per la qualitad da l'equipa. Bain savend ch'i vegn grev, spera il trenader che sia equipa possia tegnair cun. I dovria dentant ina midada dal sistem. Il club, enconuschent per ses gieu offensiv, stoppia uss, ch'il garant per sajettar gols n'è betg pli, vegnir in pau pli defensivs. Tegnair a mastregn l'adversari, na incassar massa blers gols, e sez far in u l'auter. Na be el, l'entira equipa, giavischass in pèr giugaders dapli. Surtut era per pudair crear ils trenaments pli effectiv. Sche lezs grategian bain giajan ins automatic cun dapli persvasiun en ils gieus e duels e derbis nua ch'i va per puncts, gols e mintgatant era per onur.
Tegnair il plaschair e la buna luna
Far tant enavant ina stupenta figura tar lur return en 3. liga, malgrà ils quitads. Quai spera Giacun Vinzens. Sia lavur saja era da procurar che l'equipa restia da buna luna, era sch'i na vess betg da funcziunar sco giavischà. Ed era sch'il CB Lumnezia na vess betg da pudair sa tegnair e la fin da la stagiun puspè da crudar en 4. liga, saja il pli impurtant ch'ils giugaders mantegnian il plaschair da dar ballape. Quai bunamain il pli grond giavisch dal trenader, avant che l'aventura 3. liga cumenza cun in'emna retard, per el e sia truppa.