Il Cdh Engiadina ha nominà Domenic Bott sco schef trenader. Sper el s’occupan era l’anteriur giugader Andri Ritsch, Leo Camichel ed il trenader da fin uss, Benny Wunderer, da l’emprima squadra.
Successiun en furma d'in quartet
Il nov quartet da trenaders dal Cdh Engiadina sa cumpona da Domenic Bott, Andri Riatsch, Leo Camichel e Benny Wunderer.
A la fin da la stagiun passada en segunda liga da hockey aveva il trenader da fin uss, Benny Wunderer, exprimì il giavisch da pudair dar giu la responsabladad da l’emprima equipa e da sa concentrar en futur sin la lavur cun ils juniors.
Sin la desditga dal trenader Benny Wunderer han ils responsabels dal Cdh Engiadina stuì ir sur ils cudeschs. Davent da l’entschatta era cler che l’equipa na po betg engaschar in trenader che custa plirs 10'000 francs, mabain ch'ins sto chattar ina soluziun interna. Uss ha il Cdh Engiadina chattà questa soluziun. Il schef da sport dal Cdh Engiadina, Domenic Bott, vegn schef trenader. Sper el s’occupan dentant era anc l’anteriur giugader Andri Riatsch, Leo Camichel ed il trenader fin uss da l’emprima squadra dal Cdh Engiadina Benny Wunderer.
Successiun reglada
Uschia ha il CdH Engiadina reglà la successiun sin il post da trenaders. Gia pli baud aveva il president ‘ad interim’ Domenic Toutsch dà enconuschent sia demissiun. Tar la proxima radunanza generala dal club il prim da zercladur vegn proponì a la radunanza generala il vicepresident Ruedi Haller dad Ardez sco nov president.