Siglir tar il cuntegn

Header

video
Genevra perda, tuttina tanschi per ils mezfinals
Or da Sport-Clip dals 12.12.2023.
laschar ir. Durada: 2 minutas 34 Secundas.
cuntegn

Champions Hockey League Genevra è en ils mezfinals

Il club da hockey da Genevra ha cuntanschì ils mezfinals da la Champions Hockey League. Suenter la victoria da 4:1 a chasa en l’emprima partida, han ils Genevrins pudì sa prestar cunter il club svedais Växjö ina terrada da 2:3 en la partida da return.

Il success da Genevra cunter Växjö è da valitar fitg aut. Ils Svedais n'avevan avant il duel cunter Genevra pers nagina partida da la Champions Hockey League da questa stagiun. Ed en il campiunadi svedais è sulettamain il club da Färjestad avant Växjö.

Genevra è suenter Tavau, Friburg e Zug pir la quarta equipa svizra che po sa qualifitgar per ils mezfinals, dapi che la Champions Hockey League è vegnida lantschada da nov la stagiun 2014/15. Ed en il final n'è anc nagin club svizzer arrivà. Genevra ha uss bunas schanzas da midar quai. L'adversari en il mezfinal è l'equipa finlandaisa Lukko Rauma, che stat en il campiunadi naziunal sulettamain sin rang 8 da la tabella.

Ils Lakers perdan ed èn out

A fin è la Champions Hockey League però per ils Rapperswil Jona Lakers. Els han pers la partida da return cunter ils Tschecs da Vitkovice ordaifer cun 1:5. L’emprima partida a chasa avevan ils Lakers anc gudagnà cun 2:1.

Rapperswil ha stuì desister d'impurtants giugaders tar la partida en la Tschechia. Roman Cervenka n'a betg gì la lubientscha da la federaziun tscheca da dar, el tutga tar l'equipa che dat il turnier da la Euro Hockey Tour a Turitg. E cun Emil Djuse, Victor Rask, Maxim Noreau e Brett Connolly (per l'entira stagiun) èn gist quatter giugaders da l'ester blessads. Or da la medema raschun ha mancà Gian-Marco Wetter, il meglier sittagols dals Lakers en la Champions Hockey League.

RTR novitads 06:00

Artitgels legids il pli savens