Il club da hockey da Genevra cuntanscha sco emprim club svizzer insumma il final da la Champions Hockey League. Là spetga il club svedais da Skelleftea. Il final ha lieu ils 20 da favrer a Genevra.
Suenter il 2:2 en l'emprima partida dal mezfinal, ha Genevra gudagnà ordaifer cunter ils Finlandais da Lukko Rauma cun 3:2.
Ina festa finlandaisa
Ils giugaders finlandais han dà en il tact en questa partida, e quai d'omaduas varts. Valtteri Filppula, in dals stars dal hockey finlandais, ha marcà dus gols per Genevra. Il schef da la defensiun genevrina Sami Vatanen ha egualisà al 2:2, e preparà il gol decisiv da Filppula al 3:2. Vitiers ha Teemu Hartikainen preparà l'emprim gol per Genevra. E Sakari Manninen ha fatg in assist avant il 2:2.
Genevra è l'emprima squadra da la National League che gudogna ina partida da mezfinal da la Champions Hockey League. Tavau (2016) e Friburg (2017) avevan pers lur mezfinals senza far pip. Ed avant in onn ha Zug pers duas giadas plitost stretg (0:2 e 2:3) cunter Tappara Tampere.
