- Lugano cumenza cun ina victoria da 5:1 cunter Skelleftea la Champions Hockey League.
- Cun Friburg che fa in 6:2 cunter Trinec, gudogna era la segunda equipa svizra che ha dà il venderdi sia emprima partida.
Lugano – Skelleftea 5:1
Per il nov trenader da Lugano Chris McSorley ha la stagiun cumenzà bain. Ils Tessinais han gudagnà l'emprima partida da la Champions Hockey League cunter Skelleftea da la Svezia – a chasa cun 5:1. Suenter dus terzs eran ils da Lugano cun 3:1 en avantatg. Lura han ils Svedais fatg pressiun, il goli Niklas Schlegel ha dentant mussà ina parada suenter l'autra. Ils Tessinais èn lura stads pli efficients, cun marcar dus ulteriurs gols en la 53avla ed en la 55avla minuta – a la clera victoria a chasa.
Friburg – Ocelari Trinec 6:2
Medemamain ina clera victoria a chasa fan ils da Friburg cunter Ocelari Trinec. L'equipa dal trenader Christian Dubé batta il campiun da la Tschechia cun 6:2. La decisiun è crudada al cumenzament dal segund terz. Suenter ch'ils Tschecs avevan egualisà per la segunda giada, ha Friburg gist reagì e fatg il 3:2. Cun in ulteriur gol en il segund terz, e dus gols en las davosas minutas da la partida ha Gottéron lura realisà la clera victoria.
Da remartgar en connex cun questa partida è, che Friburg n'ha survegnì durant tut las 60 minutas nagin chasti.