Il FC Barcelona ha gudagnà per la segunda giada suenter il 2021 la Champions League da las dunnas. L'equipa enturn la giugadra svizra Ana-Maria Crnogorcevic ha gudagnà il final ad Eindhoven cunter Wolfsburg cun 3:2. Suenter l'emprima mesadad manavan las Tudestgas anc cun 2:0. En la segunda mesadad èsi lura gartegià a las Spagnolas da volver la partida.
Terz titel per Crnogorcevic
Per la Bernaisa da 32 onns che gioga per la squadra naziunala sa tracti gia dal terz titel da la Champions League – in nov record svizzer.
Tudestgas senza cletg
Per las dunnas da Wolfsburg sa tracti da la quarta terrada en seria en in final da la Champions League. Ordavant han ellas gia pers il 2016, 2018 ed il 2020 mintgamai cunter il campiun da record Lyon.