Siglir tar il cuntegn

Header

cuntegn

Champions League Ils Young Boys giogan questa stagiun en la Champions League

Ils Young Boys giogan en la Champions League. Ordaifer cunter Ferencvaros Budapest gudognan ils Bernais gia sco avant in'emna cun 3:2.

Igl è la segunda giada en l'istorgia ch'ils Young Boys cuntanschan la fasa da la gruppa en la Champions League. Suenter la victoria a chasa l'emna passada era atgnamein cler - ils Bernais ston sa qualifitgar. Malgrà in um pli pauc aveva la squadra da David Wagner gudagnà a chasa cun 3:2. Cun tutta persvasiun ha YB alura era cumenzà la partida questa saira.

Gia suenter 4 minutas ha il defensur Cedric Zesiger sajettà ils Young Boys cun 1:0 en avantatg. Silsuenter è la squadra da Budapest dentant adina vegnida pli ferma. Entaifer 20 minutas ha Ferencvaros sajettà dus gols e vulvì la partida. La squadra bernaisa ha fatg la parita sco sch'ella avess pers il fil. Suenter pausa è la situaziun dentant puspè sa midada. Suenter ina bella flanca dad Elia ha Christian Fassnacht sajettà il gol decisiv per la qualificaziun en la 56avla minuta.

video
Fassnacht fa il 2:2
Or da Sport-Clip dals 24.08.2021.
laschar ir

Be paucas minutas pli tard ha YB alura schizunt dastgà giugar cun in um dapli. Laidouni da Ferencvaros è vegnì tramess cun duas cartas mellnas giu dal plaz. En la 72avla minuta avess Siebatcheu stuì decider la partida en favur dals Bernais - il penalti da l'attatgader è dentant stà sajettà fitg flaivel. Uschia ha la qualificaziun definitva stuì spetgar. En la 93avla ha alura Felix Mambimbi decis la partida e cun quei era la qualificaziun - mo secundas suenter il 3:2 e la partida stada a la fin.

Sin tgi ch'ils Bernais fruntan en la fasa da gruppa sa decida alura la gievgia.

RTR Novitads 23:00

Artitgels legids il pli savens

Scrollar a sanestra Scrollar a dretga