Siglir tar il cuntegn

Header

Dario Cologna, Nevin Galmarini, Jon Domenic Parolini e Carlo Janka.
Legenda: Dario Cologna, Nevin Galmarini, Jon Domenic Parolini e Carlo Janka. MAD
cuntegn

Chantun undrescha In banc sin la «pensiun» sportiva

La regenza ha undrà ils trais campiuns olimpics ch'èn sa retratgs la fin da questa stagiun d'enviern. Dario Cologna, Nevin Galmarini e Carlo Janka survegnan mintgin in banc da pensiun dal chantun. Vinavant ha la regenza engrazià ad els per lur prestaziun durant lur lungas carrieras plain success e per esser stads ed anc adina esser exempels sportivs per la giuventetgna grischuna.

Ils trais atlets han rimnà ensemen total 116 plazzas da podest en la cuppa mundiala.

Success sportivs

Sco emprim Svizzer insumma ha Dario Cologna gudagnà durant la stagiun 2008/09 il classament general da la cuppa mundiala da passlung. En total ha el pudì decider per sai quatter giadas il Tour de ski ed il classament general da la cuppa mundiala da passlung. Tar gieus olimpics è el stà quatter giadas il pli sisum sin il podest e l'onn 2013 è el daventà campiun mundial en il skiatlon.

Il 2009 è Carlo Janka daventà campiun mundial en il slalom gigant ed il 2010 campiun olimpic. En quella stagiun ha el er decis per sai il classament general da la cuppa mundiala. Tut en tut ha el festivà 11 victorias en la cuppa mundiala en quatter differentas disciplinas.

Als Gieus olimpics d'enviern 2014 a Sotschi ha Nevin Galmarini gudagnà ina medaglia d'argient en il slalom gigant parallel, avant ch'el è daventà l'onn 2018 a Pyeongchang campiun olimpic en la medema disciplina. Il victur da la medaglia da bronz als campiunadis mundials è stà 12 giadas sin il podest da la cuppa mundiala ed ha gudagnà il 2018 il classament general da quella.

Dominik Hardegger

Artitgels legids il pli savens

Scrollar a sanestra Scrollar a dretga