Er gia per la terza giada a la partenza a questa cursa sur trais etappas tras la Svizra franzosa è Ginia Caluori da Panaduz. Avant bun in’emna è la sportista da 22 onns anc sa participada al campiunadi mundial da mountainbike a Vallnord en l’Andorra. En la cursa da cross country da las dunnas U23 è Caluori vegnida 9avla.
Per il proxim temp baratta Ginia Caluori dentant il mountainbike cun il velo da cursa. Al Tour de Romandie parta ella per l’equipa svizra da Swiss Cycling. Il grond trumf e capitani en quest team è Noemi Rüegg dal chantun Turitg ch’è vegnida questa onn 7avla en la cursa da via dals gieus olimpics a Paris. Suenter il Tour de Romandie è Caluori er gist vegnida selecziunada per il campiunadi d’Europa dals 11 fin ils 15 da settember en la provinza Limburg en la Belgia.
Tuttas cunter Demi Vollering
La gronda favurita al Tour de Romandie Féminin 2024 è Demi Vollering, l’Ollandaisa che viva dentant en Svizra al Lai dals Quatter Chantuns. Er candidatas per la victoria èn plinavant l’Ollandaisa Pauliena Rooijakkers, la Franzosa Evita Muzic e la Taliana Gaja Realini. Tuttas èn er stadas classadas sut las top tschintg al Tour de France da las dunnas. Sin la glista da las favuritas figurescha er anc la campiunessa mundiala Lotte Kopecky da la Belgia. Sa retratga dal Tour de Romandie è perencunter la Polaca Katarzyna Niewiadoma ch’ha triumfà quest onn al Tour de France. Ord vista svizra ha Elise Chabbey las meglras cartas. Al Tour de France era la ciclista da 31 onns da Genevra però cupitgada e silsuenter stuì dar si la cursa. Vinavant betg a la partenza è Marlen Reusser pervia da problems da sanadad.
Program Tour de Romandie Féminin 2024
Venderdi, ils 6 da settember
- Emprima etappa da La Grande Béroche a Losanna sur 133,8 km cun 1907 m d’autezza
Sonda, ils 7 da settember
- Segunda etappa da Chippis a Vercorin sur 101,9 km cun 1384 m d’autezza
Dumengia, ils 8 da settember
- Terza etappa da Morges a Morges sur 144,2 km cun 2035 m d’autezza
