Be trais dis suenter ch’ella è cupitgada grevamain, ha l’Ollandaisa Annemiek van Vleuten gudagnà la medaglia d’aur en la cursa sin via – e quai cun in cumbel rut. Per la ciclista da 39 onns èsi il segund titel da campiunessa mundiala suenter il 2019. Argient ha gudagnà la Belgia Lotte Kopecky e bronz la Taliana Silvia Persico. Meglra Svizra è stada Elise Chabbey sco novavla. Marlen Reusser ha terminà la cursa sin il 13avel plaz.
In sprint n'avess betg pudì far cun quest cumbel. Lura hai jau attatgà. Quai è stà la suletta schanza. Jau spetgav ch'i ma tschiffan anc – Ellas n'èn però betg vegnidas.
Chabbey ha però tuttina manchentà ina medaglia mo per paucs meters. Ensemen cun ulteriuras otg ciclistas era ella sin l'ultim kilometer, avant che Van Vleuten ha surpassà la gruppa surprendentamain. Van Vleuten ch'ha gia gudagnà questa onn il «Giro», il «Tour de France» e la «Vuelta» è suenter restada a la testa fin a l'arrivada. En il sprint per plaz dus n'ha Chabbey lura betg pudì dominar.