Meglra svizra è la finala stada Elisa Gasparin, quai dentant er be sco 49avla cun in sulet sbagl da sajettar. Cun Amy Baserga sco 54avla cun trais sbagls da sajettar ha anc ina segunda svizra almain pudì sa qualifitgar per la cursa da persecuziun cun las meglras 60.
Aita Gasparin ch’ha festivà al di dal sprint ses anniversari da 30 onns ha sco 62avla manchentà be per pauc las top 60. La giuvna da las soras Gasparin ha fatg dus sbagls da sajettar.
Reacziuns da las biatletas svizras
Debachel per Lena Häcki-Gross
Al grond trumf svizzer, Lena Häcki-Gross, è la cursa ida dal tuttafatg en las chautschas. Gist al punct culminant da quest onn ha la biatleta dad Engelberg mussà sia pli schletta cursa da la stagiun. Cunzunt da sajettar sin pes n’è quasi nagut reussì ad Häcki-Gross. Cun total tschintg sbagls da sajettar ha ella cuntanschì l’arrivada cun in retard da pass trais minutas e mesa. Sco 66avla ha ella uschia manchentà cleramain la qualificaziun per la cursa da persecuziun da la dumengia. Ses mender resultat en questa stagiun era fin oz in 17avel plaz.
Festa franzosa a Nove Mesto
Procurà per la musica en questa cursa da sprint han las Franzosas ch’han festivà in quatter-dubla victoria. Campiunessa mundiala è vegnida Julia Simon. Ella ha triumfà avant sias cumpatriotas Justine Braisaz-Bouchet e Lou Jeanmonnot. Gia en l’emprima cursa, la staffetta maschedada, aveva la Frantscha gudagnà aur. En questa cursa avevan ils Svizzers, tranter auter cun Lena Häcki-Gross ed Amy Baserga, manchentà be per pauc ina medaglia sco quarts.