Il pilot da bob indigen Cédric Follador ha gì fin qua ina fitg buna stagiun. Cun la schlitta gronda, cun il bob a quatter è Follador stà rangà tschintg giadas tranter ils megliers 10. Uschia è el vegnì nominà da la federaziun svizra da bob e da skeleton ‘Swiss Sliding’ per il punct culminant a San Murezzan. Sco finamira persunala aveva Cédric Follador exprimì il giavisch da terminar las cursas cul bob a quatter sco otgavel. A la fin resulta ina novavla plazza. Sin plazza otg mancan 34 tschientavels. Tuttina po Cédric Follador esser cuntent cun ils campiunadis mundials. Anc mai n'ha il pilot da 20 otg onns da Bever cuntanschì uschè buns resultats.
Cursa da nostalgia
Mintg'onn laschan bobistas e bobists reviver la lung'istorgia da bob a San Murezzan. Cun vestgadira veglia e bobs antics van els giu per il chanal da glatsch. In inscunter famigliar ma er internaziunal nua che persunas da num e da pum s'inscuntran. Cun bobs da fier cun ina roda da manischar e senza segirezza enturn ed enturn sa ristgan oz mo pli paucs pilots da bob da guidar sin la bobera da San Murezzan a Schlarigna. En il center da la cursa nostalgica stat il giudiment ed il plaschair.
Bilantscha organisatorica positiva
Durant las davosas duas emnas era il chanal da glatsch da San Murezzan a Schlarigna il Mecca dal sport da bob, skeleton e para bob. En numerusas cursas han las meglras pilotas ed ils megliers pilots cumbattì per medaglias. L’equipa Svizra ha gudagnà duas medaglias da bronz tar quest campiunadi mundial. Michael Vogt en il bob a dus e Christopher Stewart en la disciplina para bob. L’aura en Engiadin'Ota e las temperaturas perfetgas han pussibilità als organisaturs da realisar il program sco planisà. Tut ha funcziunà tenor giavisch.
