Per Sara Schmied da Schlarigna è la participaziun al campiunadi mundial da skeleton a San Murezzan ina gronda onur. Cun be 17 onns è ella la pli giuvna da l’entira concurrenza. Sara Schmied s'è qualifitgada per questa concurrenza cun mussar bunas prestaziuns durant quest enviern. Ella è per exempel vegnida a Winterberg en Germania vicecampiunessa mundiala da las junioras sut 20 onns.
Campiunadi mundial a chasa
Sara Schmied è creschida si a Schlarigna e viva en il vitg da l’Engiadin'Ota. Davent da chasa sa ella ir cun la schlitta a la bobera da San Murezzan a Schlarigna. Perquai saja quai insatge tut spezial da participar a quest campiunadi mundial. E perquai vul ella sa chapescha mussar bunas prestaziuns. Cun plazza 22 en la concurrenza da skeleton da las dunnas è quai grategià a Sara Schmied.
Unica curridura svizra a la partenza
L’equipa da skeleton da las dunnas svizras è actualmain fitg pitschna. La leadra da l’equipa Marina Gilardoni è ferida e na po uschia betg far part als champiunadis mundials en patria. Sara Schmied è uschia l’unica svizra ch’è a la partenza.
