La curunaziun dad ina stagiun d’enviern è segira la nominaziun per in campiunadi mundial. Sch'ins è da la partida tar il punct culminant da la stagiun vul quai dir che ins ha mussà durant l’entir enviern bunas prestaziuns. Gest otg passlunghistas e passlunghists grischuns sun stads da la partida als campiunadis mundials. Sco unica è Marina Kälin da San Murezzan turnada cun ina medaglia da Whistler en il Canada.
Marina Kälin cun bronz, Steiger sin plazza quatter
Tut è i si quel di che la giuvna passlunghista da San Murezzan ha gudagnà bronz en la cursa da 10 kilometers en il stil liber. Gia in per dis avant, durant la cursa da 20 kilometers en il stil classic, ha la passlunghista engiadinaisa sentì ch'i marscha bain. Alura era ella vegnida tschintgavla. In per dis suenter era ella anc stancla da la cursa. Suenter l’emprima runda ha ella dentant sentì che i va bain. Uschia è ella currida sin il podest.
Sumegliant è quai stà tar Niclas Steiger da Samedan. Er el è vegni durant ils campiunadis mundials adina meglier en furma. La fin finala ha el cuntanschì tar la medema cursa plazza quatter. Sin il podest han mancà be tschintg secundas.
La premiera da Noe Näff
Insumma per l’emprima giada è Noe Näff da Sent stà ad in eveniment grond. Il passlunghist da Sent sa aveva prendì avant bler per las cursas a Whistler. En spezial per sia cursa preferida, ils 20 kilometers en il stil classic. Durant l’entir temp dals campiunadis mundials en il Canada na è Noe Näff dentant betg propi vegnì sin turas. Gia en il sprint n'ha el betg pudì cumbatter cun ils megliers, ed uschia er en la cursa da 20 kilometers en il stil classic. Tuttina èn ils campiunadis mundials stads per el ina aventura ch'el na vegn mai pli ad emblidar.
