Janis Baumann sut ils top 25
Ina buna cursa ha er il Grischun Janis Baumann mussà a Val di Sole. Tar sia emprima cursa ad in campiunadi mundial cun ils U23 è il mountainbiker dad Igis vegnì 24avel cun in retard da 5:14 minutas. Per Janis Baumann èsi ina buna prestaziun, el è stà cun ses 19 onns in dals pli giuvens a la partenza. Avant in onn era Baumann daventà vice-campiun mundial tar ils juniors.
Victoria chilena
Nov campiun mundial tar ils umens U23 ed uschia successur dal Brit Tom Pidcock ch’ha dà forfait per il campiunadi mundial a Val di Sole è il Chilen Martin Vidaurre Kossmann. Il mountainbiker sidamerican da 21 onns ha gudagnà cun in avantatg da 1:03 minutas sin il Talian e mattadur local Juri Zanotti. Joel Roth sco terz ha pers 1:38 minutas sin Martin Vidaurre. Stuì dar si la cursa ha tranter auter il Svizzer Alexandre Balmer che valeva sco in dals cunfavurits per ina medaglia.
Festa austriaca tar las dunnas U23
L’Austria na sto betg pensar per l’avegnir dal sport da mountainbike tar las dunnas. Cun Mona Mitterwallner e Laura Stigger ha l’Austria duas mountainbikeras cun il pli grond talent en la disciplina cross country.
Mona Mitterwallner è daventada campiunessa mundiala tar las dunnas U23, quai a moda suverana. La campiunessa mundiala e campiunessa d’Europa tar las junioras il 2020 ha en ses emprim onn tar las dunnas U23 distanzià l’entira concurrenza a Val di Sole. Mitterwallner ch’ha pir 19 onns e ch’ha er gia gudagnà en questa stagiun las emprimas quatter cursas da la cuppa mundiala en sia categoria ha battì sia cumpatriota Laura Stigger per 2:04 minutas. Er Stigger era vegnida duas giadas campiunessa mundiala tar las junioras. Plinavant ha ella er festivà in titel da campiunessa mundiala sco juniora cun il velo da via. Cumplettà il podest sco terza ha Caroline Bohé. La Danaisa ha pers 3:26 minutas sin Mitterwallner.
Ina suletta svizra sut las top 10
Cun Noëlle Buri dal chantun Berna ha sulet ina svizra pudì persvader en questa cursa da cross country da las dunnas U23. Buri è vegnida 8avla cun in retard da 5:51 minutas sin Mona Mitterwallner. Jacqueline Schneebeli e Rebekka Estermann han pers omaduas enturn set minutas ed èn classadas sin las posiziuns 12 e 13.
Betg a la partenza è stada la Franzosa Loana Lecomte, la gronda favurita ch’ha gudagnà en questa stagiun tut las cursas da la cuppa mundiala tar l’elita.