Siglir tar il cuntegn

Header

Legenda: Nino Schurter e Val di Sole, fin oz in'istorgia da success. Keystone
cuntegn

CM MTB Val di Sole Nino Schurter: «Jau sun en sasez pront per in ulteriur titel»

Otg giadas è Nino Schurter gia daventà campiun mundial tar l’elita, tranter il 2015 ed il 2019 schizunt tschintg giadas en seria. A Val di Sole cumbatta il mountainbiker oriund da Tersnaus per in ulteriur titel, er sch’el na s’auda questa giada betg tar ils top-favurits.

Schanza da far revantscha

Al campiunadi mundial en il Trentino survegn Nino Schurter er la schanza da far revantscha per la terrada al davos campiunadi mundial il 2020. A Leogang en l’Austria veva el stuì sa cuntentar cun il 9avel plaz. Revantscha vul Schurter er far per il quart plaz als gieus olimpics. Auter che a Tokyo nua ch’el ha manchentà be piz a cup ina medaglia duai quai uss sa midar a Val di Sole. In dals gronds concurrents en il cumbat per il titel è ses cumpatriot Mathias Flückiger. Perencunter manca l’Ollandais Mathieu van der Poel che patescha da problems cun il dies.

audio
Discurs cun Nino Schurter davart sias finamiras
02:53 min, Actualitad dals 26.08.2021.
laschar ir. Durada: 02:53 minutas.

Bunas regurdientschas da Val di Sole

A Val di Sole ha Nino Schurter gia festivà blers success. Il 2008, tar l’emprim campiunadi mundial en questa regiun, è Schurter daventà campiun mundial en la categoria dals umens sut 23 onns. Silsuenter ha el gudagnà tschintg giadas ina cursa da la cuppa mundiala a Val di Sole. Sin quest percurs sa sesenta il campiun olimpic da Rio bain. I saja ina cursa fitg tecnica e moderna, uschia Nino Schurter.

Perquai ch’jau n’hai pli probabel betg grondas schanzas en la cursa da short track èsi meglier da metter il focus cumplainamain sin la cursa roiala da cross country.
Autur: Nino Schurter mountainbiker
audio
Discurs cun Andreas Wieland davart novas disciplinas e fans
06:27 min, Actualitad dals 26.08.2021.
laschar ir. Durada: 06:27 minutas.

Focus total sin cursa roiala

Nino Schurter va be ina suletta giada a la partenza a quest campiunadi mundial a Val di Sole. El sa concentrescha cumplainamain sin la cursa roiala da cross country ed ha perquai dà forfait tant per la cursa da staffetta, il Team Relay, sco er per la cursa da short track che festivescha sia premiera a campiunadis mundials. Il short track saja ina cursa explosiva che vegnia savens decidida en in sprint final, ed en il sprint na s’audia el betg pli tar ils megliers. Uschia na vessi quai betg fatg grond senn dad ir a la partenza a quai format da cursa, uschia il mountainbiker grischun ch’è cun ses 35 onns in dals seniors a quest campiunadi mundial.

Actualitad 07:00 uras

Artitgels legids il pli savens

Scrollar a sanestra Scrollar a dretga