Il FC Lucerna fa il pass en la terza runda da qualificaziun per la Conference League. Suenter il 2:1 en l’emprim gieu cunter Djurgarden Stockholm – han ils Lucernais dà pari 1:1 en il gieu da return la gievgia saira, e quai ha tanschì.
L’equipa dal trenader Mario Frick è ida en la 26avla minuta en avantatg, il defensur Marco Burch ha fatg il 1:0. Curt avant la pausa han ils Svedais lura pudì egualisar tras Joel Asoro. En la fasa finala dal gieu ha Lucerna gì pliras giadas cletg da betg incassar in ulteriur gol.
En la terza runda da qualificaziun per la Conference League frunta Lucerna sin Hibernian Edinburgh da la Scozia. Gia gievgia proxima è l’emprim duel.
Basilea out malgrà victoria
Per il FC Basilea percunter è la segunda runda da qualificaziun per la Conference League la staziun finala. Bain han ils da Basilea gudagnà il gieu da return tar il FC Tobol Kostanay cun 2:1. Quai n'ha dentant betg tanschì per prender suenter il retard dad 1:3 or da l'emprim gieu.