Senza problems fa il FC Basilea il pass en la proxima, la penultima runda da qualificaziun per la Conference League. En il gieu da return da gievgia saira batta Basilea ordaifer Partizani Tirana cun 2:0 Gia en l'emprim gieu aveva il FCB persvadì – e gudagnà cun 3:0.
Il proxim adversari da Basilea è l'equipa ungaraisa Ujpest, ord la chapitala Budapest. Quella ha bittà il FC Vaduz cun il resultat total da 5:2, or da la qualificaziun per la Conference League.
Servette è stà datiers
Per il club genevrin è l’aventura europeica a fin suenter la segunda runda da qualificaziun da la Conference League. Bain ha Servette gudagnà il gieu da return a chasa cunter il club norvegiais Molde cun 2:0, il dischavantatg dal 0:3 or da l’emprim gieu è dentant stà memia grond.
Suenter che duas terzas dal gieu eran passadas, manava Servette cun 2:0. Curt avant la pausa avevan els dentant pers il giugader Miroslav Stevanovic, pervi d’in foul ha quel survegnì directamain la carta cotschna. La finala n’hai betg tanschì a Servette da volver il gieu, e d’almain cuntanscher ina prolungaziun.