Siglir tar il cuntegn

Header

video
Lara Gut-Behrami persvada in'ulteriura giada a Cortina d'Ampezzo.
Or da Sport-Clip dals 26.01.2024.
laschar ir. Durada: 1 minuta 46 Secundas.
cuntegn

Cortina d'Ampezzo Lara Gut-Behrami franada be da Venier

La segunda victoria da la cuppa mundiala per l'Austriaca Stephanie Venier stat en la sumbriva da numerusas cupitgadas en ina cursa rapida turbulenta a Cortina d'Ampezzo en l'Italia. Persvadì ha er Lara Gut-Behrami sco segunda. Ella veva gia gudagnà questa cursa rapida il 2017.

video
Lara Gut-Behrami: «Bleras skiunzas èn malsegiras»
Or da Sport-Clip dals 26.01.2024.
laschar ir. Durada: 3 minutas 48 Secundas.

Cun ses segund plaz cuntanscha Lara Gut-Behrami ses emprim podest da da questa stagiun en la disciplina cursa rapida. Pli sperta che la Tessinaisa è sulettamain stada l'Austriaca Stephanie Venier ch'ha cunzunt persvadì sin la davosa part da la cursa nua ch'ella è stada quasi ina secunda pli sperta che la Svizra. Sin plaz trais suondan giest trais skiunzas cun il medem temp, ex aequo èn quai la Taliana Sofia Goggia, l'Austriaca Christina Ager e la Canadaisa Valerie Grenier.

video
La cursa rapida da Stephanie Venier
Or da Sport-Clip dals 26.01.2024.
laschar ir. Durada: 1 minuta 29 Secundas.

Il podest:

  1. Stephanie Venier (AUT) 1:33,06 minutas
  2. Lara Gut-Behrami (SUI) +0,39 sec.
  3. Sofia Goggia (ITA), Christina Ager (AUT), Valerie Grenier (CAN) +0,71 sec.
video
Corinne Suter sto interrumper sia cursa
Or da Sport-Clip dals 26.01.2024.
laschar ir. Durada: 42 Secundas.

Las ulteriuras Svizras:

  • 10. Joana Hählen +1,11 sec.
  • 12. Jasmine Flury +1,14 sec.
  • 29. Delia Durrer +2,54 sec.
  • out: Priska Nufer, Corinne Suter, Michelle Gisin e Stephanie Jenal
video
Michelle Gisin mitscha cun in egl blau
Or da Sport-Clip dals 26.01.2024.
laschar ir. Durada: 56 Secundas.

Er Shiffrin cupitga ferm

Per in dals muments da schoc ha Corinne Suter procurà. Ella ha interrut sia cursa gia baud suenter in sigl. Sco i para è ella sa blessada pli ferm vid in schanugl. En il medem lieu sco la Svizra è era Mikaela Shiffrin cupitgada. L'Americana sco era Suter han stuì vegnir transporta davent cun il helicopter. Cupitgadas èn tranter autras era Michelle Gisin, Priska Nufer e la Taliana Federica Brignone.

video
Mikaela Shiffrin sa tschenta en la rait da segirtad
Or da Sport-Clip dals 26.01.2024.
laschar ir. Durada: 30 Secundas.

Il program a Cortina d'Ampezzo cuntinuescha damaun cun ina segunda cursa rapida. La dumengia spetga sin las skiunzas anc in super-g.

RTR novitads 14:00

Artitgels legids il pli savens