Da quatter hai dà trais e lura be anc dus. Amez la cursa è cun Alan Hatherly er anc l'ultim concurrent dal quartet oriund crudà enavos ed ha cun quai pussibilità la victoria dubla dals dus Svizzers. Mathias Flückiger gudogna la cursa davant Nino Schurter. Avant era gia Vlad Descalu (RUM) crudà memia lunsch enavos per pudair cumbatter per ina plazza da podest.
- Mathias Flückiger (SUI)
- Nino Schurter (SUI)
- Alan Hatherly (SA)
Flückiger ha pudì tegnair la dira
Fertant ch'il Rumen ha uschia per l'emprima giada manchentà ina plazza da podest durant questa stagiun, è la plazza da podest per il Sidafrican stada ina premiera. Cun sia victoria ha Mathias Flückiger impedì la 34avla victoria da Schurter, quai che avess muntà il nov record da victorias per Schurter. Actualmain è el numnadamain egualisà cun las 33 victorias da Julien Absalon.
Albin manchenta top 10
Ses exploit da venderdi n'ha Vital Albin betg pudì repeter. Il giuven da Tersnaus n'ha betg pudì profitar da sia plazza da start davanttiers ed ha finì la cursa sin il 20avel plaz. Terz meglier Svizzer è vegnì Andri Frischknecht sin plazza 13.
Sina Frei manchenta cnap ina plazza da podest
Fertant ch'i n'ha strusch dà insatge interessant a la testa, han Sina Frei e Laura Stigger cumbattì fin l'ultim per il terz plaz. Deplorablamain cun il curt per la Svizra. Frei n'ha betg pudì tegnair cun il tempo da l'Austriacca durant l'ultima runda. Ella ha perquai manchentà ses emprim sigl sin il podest da al cuppa mundiala.
Il podest:
- Loana Lecomte (AUT)
- Jenny Rissveds (SWE)
- Laura Stigger (AUT)
Neff e Keller en las top 10
Malgrà che Frei n'ha betg dumagnà sin il podest, ha ella mussà sia meglra prestaziun da stagiun fin uss. Jolanda Neff ha bain gì in start svelt, n'ha dentant betg pudì tegnair il tempo ed è uschia la finala daventada 8avla. Cun quai n'ha ella sco sias collegas Alessandra Keller (10.) e Linda Indergand(11.), betg pudì cumbatter davant per la victoria dal di.