Cun Jolanda Neff ha er la campiunessa mundiala dal 2017 persvadì. Neff ha suenter ses grev accident la fin da l’onn passà cuntanschì il 6avel plaz cun in retard da 4:46 minutas. In plaz sut las top 10 hai er dà per Alessandra Keller. Ella è vegnida cun in retard da 6:25 minutas 10avla. Linda Indergand e Nicole Koller han terminà la cursa sin ils plazs 15 e 16.
Ferrand-Prévot ina classa per sa sezza
Triumfà en la cursa d’elita da las dunnas ha la Franzosa Pauline Ferrand-Prévot. La defensura dal titel è stada en in liga per sa sezza. Ella ha mussà ina cursa excellenta e distanzià l’entira concurrenza per trais minutas e dapli. Per Ferrand-Prévot, la partenaria da la legenda franzosa Julien Absalon ch'è daventà duas giadas campiun olimpic, è quai gia il terz titel da campiunessa mundiala en la disciplina cross country. Ses emprim titel aveva ella gudagnà il 2015.
Cumplettà il podest ha sco segunda la Taliana Eva Lechner (+ 3:01) e sco terza l’Australiana Rebecca McConnell (+ 3:01). Lechner ha gudagnà il sprint final per plaz dus e trais per paucs centimeters.
Grevas cundiziuns
La cursa dal campiunadi mundial a Leogang ha pretendì tut, tant da las atletas sco er dal material. Pliras atletas han uschia stuì ceder, tranter auter la campiunessa mundiala dal 2018, L'Americana Kate Courtney sco er l'Ollandaisa Anne Terpstra e la Svedaisa Jenny Rissveds, la campiunessa olimpica da Rio 2016.