En ils emprims nov gieus da campiunadi aveva Trun/Rabius sajettà be set gols. Encunter Sargans èsi reussì da sajettar sis gols entaifer be 90 minutas. Cumenzà ha il gieu dentant mal per Trun/Rabius. Mo suenter il 0:1 da Sargans è l’equipa da chasa sa dasdada, e fin la pausa ha ella vulvì il resultat al 3:1.
Avant il davos gieu da campiunadi è il CB Trun/Rabius da nov sin il 10avel plaz da la tabella – cun ina reserva da dus puncts sin Gams, ch’è da nov sin ina plazza da relegaziun. Gams ha pers la sonda ordaifer encunter Triesenberg cun 2:4.
I spetga ina finalissima
En la davosa runda da campiunadi frunta il CB Trun/Rabius ordaifer sin Gams. Per omaduas equipas vai per restar en la terza liga – igl è ina uschenumnada finalissima. Als Sursilvans tanscha in pari per restar en la terza liga. Cun la victoria da gala encunter Sargans han ils da Trun/Rabius en mintga cas tancà morala e motivaziun per quest gieu chapital.
Domat na dat betg si la speranza
Anc siemiar da far il pass en la 2. liga regiunala astga il Club da ballape da Domat. Suenter la victoria da 2:1 encunter Buchs han ils da Domat vinavant be in punct pli pauc ch'il leader, il Club da ballape da Bogn Ragaz. Gudogna Domat il davos gieu da campiunadi, il derbi ordaifer encunter Cuira e na vegn Bogn Ragaz betg da gudagnar a Buchs sonda proxima, ils 3 da fanadur, lura tanschessi a Domat da far il pass a la testa da la tabella e per la promoziun en 2. liga.