Siglir tar il cuntegn

Header

audio
Wendy Holdener gudogna argent en la cumbinaziun a Méribel
Or da Actualitad dals 06.02.2023. Maletg: Keystone
laschar ir. Durada: 2 minutas 34 Secundas.
cuntegn

Cumbinaziun dunnas Wendy Holdener gudogna argient

Wendy Holdener è e resta in garant da medaglias en la cumbinaziun alpina. Suenter duas giadas aur als campiunadis mundials il 2017 a San Murezzan ed il 2019 ad Are e bronz ed argient als davos gieus olimpis a Pyeongchang ed a Peking datti uss er argient als campiunadis mundials a Courchevel Méribel.

Per Wendy Holdener èsi gia la 10avla medaglia ad occurrenzas grondas. 5 medaglias ha la skiunza da 29 onns dal chantun Sviz gudagnà a campiunadis mundials, 5 medaglias a gieus olimpics. Per quella medaglia d'argient en las Alps franzosas ha Holdener dentant stuì cumbatter fitg. Suenter il super-g er'ella classada be sin il 15avel plaz. Grazia al meglier temp en il slalom ha ella dentant anc pudì far in grond pass enavant.

video
Il slalom da Wendy Holdener ch'ha manà ad argient
Or da Sport-Clip dals 06.02.2023.
laschar ir. Durada: 1 minuta 11 Secundas.

Betg ì sco giavischà èsi a Michelle Gisin. La dubla campiunessa olimpica en la disciplina olimpica ha stuì sa cuntentar a Méribel cun il 6avel plaz. Priska Nufer è vegnida 12avla e Lara Gut-Behrami, anc segunda suenter il super-g, n'è betg ida a la partenza al slalom. La Tessinaisa ha nizzegià il super-g sco trenament per il super-g da la mesemna nua ch'ella parta sco ina da las grondas favuritas.

Brignone ina classa per sa sezza – Shiffrin croda ora

L'emprima medaglia dad aur va a l'Italia. Federico Brignone che veva gia dominà il super-g ha er persvadì en il slalom e la finala gudagnà suveran ses emprim titel da campiunessa mundiala. Avant 13 onns, il 2011 a Garmisch-Partenkirchen, aveva la skiunza da 32 onns da Milaun gudagnà argient en il slalom gigant. A Courchevel Méribel è Brignone stada 1,62 secundas pli sperta che Wendy Holdener e 2,26 secundas pli sperta che l'Austriaca Ricarda Haaser che gudogna bronz.

video
Mikaela Shiffrin sto sutterar la medaglia dad aur curt avant l'arrivada
Or da Sport-Clip dals 06.02.2023.
laschar ir. Durada: 53 Secundas.

La gronda favurita e defensura dal titel, l'Americana Mikaela Shiffrin, è crudada ora curt avant l'arrivada dal slalom. Shiffrin era sin buna via da gudagnar ses emprim titel a quests campiunadis mundials en Frantscha.

RTR actualitad 12:00

Artitgels legids il pli savens