Briglià n'ha il HCD betg en quest pre-mezfinal encunter IFK Helsinki. Ma la reacziun suenter il debachel da 2:9 encunter Sparta Prag la mesemna è stada cleramain visibla. Durant las entiras 60 minutas ha l'engaschi e la tenuta sin il glatsch constà tar ils Grischuns.
En las emprimas minutas è la gnervusitad stada evidenta tar il HCD. Uschia n'hai betg fatg surstar che Helsinki è ì en avantatg en la 8avla minuta. Curt suenter ha Matej Stransky dentant pudì egualisar en powerplay. En la 27avla minuta ha Andres Ambühl sajettà per l'emprima giada en avantatg ils Grischuns. Sin quest gol han ils Finlandais anc pudì reagir, sin il 3:2 da Marc Wieser en la 54avla minuta n'ha IFK Helsinki dentant gì nagina resposta.
Per il HCD è questa victoria stada fitg impurtanta. Il matador local dal turnier resta vinavant da la partida, e venderdi vegni tar il grond duel svizzer – Tavau encunter Ambri-Piotta.
Per il Team Canada è la Cuppa Spengler gia a fin
Gronda trumpada per il Team Canada a la Cuppa Spengler 2022. Suenter mo trais gieus è il turnier gia a fin per il victur da record. Sco gia en ils emprims dus gieus, ha l'efficienza era mancà en il terz gieu tar il Team Canada. Ils Canadais dian adia cun avair sajettà mo 4 gols en 3 gieus.
I n'è betg uschia ch'il Team Canada n'ha betg mussà engaschi. Las emoziuns èn davent da l'emprima minuta stadas avant maun tar ils «Maple Leafs», ma sco era gia encunter Sparta Prag ed encunter il HCD han els gì grondas bregias da tegnair pitg a l'adversari en las emprimas minutas. Il sulet gol per il Canada ha Chris DiDoemnico pir sajettà paucas minutas avant la fin.
Per Örebro vai vinavant damaun cun il mezfinal encunter Sparta Prag. Ils Svedais han mussà che lur finamira è nagut auter che la victoria a la Cuppa Spengler 2022. Cun tipic hockey svedais, numnadamain disciplinà ed efficient, èn els in adversari malempernaivel per mintg'equipa.