Exact en in onn as mesiran las meglras snowboardistas ed ils megliers snowboardists, dentant er las spezialistas ed ils spezialists da freestyle als campiunadis mundials en l’Engiadin'Ota. Per l’emprima giada ha lieu uschè in campiunadi mundial en Svizra e per l’emprima giada in campiunadi cun gist 15 differentas disciplinas. Il mars 2025 vegn l’Engiadina'Ota perquai ad esser il mecca dal sport da freestyle.
Occurrenzas da test en tuttas disciplinas
Ils organisaturs dals proxims campiunadis mundials èn obligads d'organisar cursas ed eveniments en tut las disciplinas. In onn avant il tun da partenza per ils campiunadis han ins organisà sin la Corviglia las emprimas cursas da snowboard alpin. Sin la medema costa sco che las dunnas da ski alpin filan en direcziun da l’arrivada a Salastrains ha quai dà per l’emprima giada cursas da snowboard. E questa premiera è grategiada per la Svizra. Ladina Jenny da Glaruna ha gudagnà. Tar ils umens è l’Austriac Benjamin Karl stà il pli spert.
Emoziuns differentas tar las Engiadinaisas
La versada da las duas snowboardistas engiadinaisas Larissa Gasser è stada cuntenta cun sia prestaziun. La snowboardista da Madulain ha terminà la cursa sin plazza 14. Sch’ella resguarda il fatg che quasi l’entira elita mundiala era a la partenza a San Murezzan saja quai in bun resultat. Auter las emoziun tar la giuvna, tar Ricarda Hauser da Scuol. Ella n'è simplamain betg stada buna da far tempo sin la pista dals proxims campiunadis mundials ed è vegnida 28avla.
