La Grischuna Irene Cadurisch aveva ina buna posiziun suenter il sprint da la sonda – cun set sbagls da sajettar en la persecuziun è ella dentant crudada enavos sin plaz 32. Meglra Svizra daventa Selina Gasparin, malgrà ch'ella sto far trais rundas da chasti sa lavura ella dal 48avel sin il 22avel plaz.
Victura da la persecuziun a Nove Mesto, sco gia la sonda tar il sprint, daventa la Norvegiaisa Tiril Eckhoff. Ella augmenta uschia ses avantatg en il classament general da la cuppa mundiala. Segunda è la Tudestga Denise Herrmann, e cun Marte Olsbu Roiseland daventa in'ulteriura Norvegiaisa terza.
Las ulteriuras biatletas svizras:
- 41. Aita Gasparin (4 sbagls da sajettar)
- 50. Elisa Gasparin (5 sbagls da sajettar)
- Betg sa qualifitgada per la persecuziun era Lena Häcki.
Victoria dubla dals frars Bö – Weger 26avel
Era tar la persecuziun dals umens han ils Svizzers mussà ina prestaziun mudesta. Benjamin Weger ha bain fatg bun diesch plazs en cumparegliaziun cun il sprint da la sonda – il sigl da plaz 36 sin 26 n'è dentant betg grond. Martin Jäger daventa 45avel.
Victur da la persecuziun a Nove Mesto è daventà il Norvegiais Tarjei Bö, avant ses frar Johannes Thingnes Bö. Terz daventa il victur dal sprint da la sonda, il Franzos Simon Desthieux.