Siglir tar il cuntegn

Header

Planai, Schladming
Legenda: Las cursas da la cuppa mundiala a Schladming procuran onn per onn per grond'atmosfera e spectacul. Keystone
cuntegn

Cuppa mundiala a Schladming «The Nightrace» sin la Planai fascinescha

Las cursas da skis ad Adelboden, Wengen e Kitzbühel valan sco ils pli gronds classichers en la cuppa mundiala. Vitiers dastgan ins dentant franc er quintar las cursas a Schladming en la Steiermark che carmalan onn per onn millis e millis da fans a l’ur da la pista.

audio
Livio Simonet e la fascinaziun da Schladming
ord Actualitad dals 24.01.2024. Maletg: Keystone
laschar ir. Durada: 3 minutas 55 Secundas.

L’emprima cursa da la cuppa mundiala sin la pista Planai è vegnida organisada il 1973, ina cursa rapida che Franz Klammer ha gudagnà avant ils dus svizzers Roland Collombin e Bernhard Russi. Dus onns pli tard hai dà l’emprim slalom sin la Planai. Quel ha gudagnà l’Austriac Hansi Hinterseer avant il Svedais Ingemar Stenmark ed il Talian Piero Gros. Victur da record a Schladming è l’Austriac Marcel Hirscher cun tschintg victorias. El ha gudagnà quatter giadas il slalom ed ina giada il slalom gigant.

Millis e millis da fans

Dapi il 1997 è il slalom da notg in punct fix en il chalender da cursas da la FIS. Questa cursa che vegn era numnada «The Nightrace» e che vegn manada atras sut illuminaziun indirecta carmala onn per onn fin 50’000 fans a l’ur da la pista e sin las tribunas giganticas en l’arrivada e vi dal Hohenhaus Tenne, il pli grond local d’après-ski en l’Europa. Er giu dal tetg da quest bajetg persequiteschan onn per onn millis da fans quest spectacul da notg. Il slalom da notg a Schladming è uschia la cursa da la cuppa mundiala cun ils pli blers fans al lieu. Ils davos dus onns han er ils spezialists da slalom gigant dastgà ir a la partenza ad ina cursa da notg sin la Planai.

Schladming ha er gia manà atras duas giadas ils campiunadis mundials da skis, l’emprima giada il 1982 e la davosa giada il 2013. Ils campiunadis mundials avant 10 onns n’han però betg purtà bler cletg als Svizzers. Per els hai dà sulet ina medaglia d’argient entras Lara Gut-Behrami en il super-G.

RTR actualitad 17:00

Artitgels legids il pli savens