Per l’emprima giada dapi il campiunadi mundial il 2017 a San Murezzan hai puspè ina giada dà cursas rapidas sin la pista da la Corviglia. Gist duas cursas rapidas eran planisadas. E per finir anc il program da las cursas da la cuppa mundiala da skis a San Murezzan en il super-G.
L’emprima cursa anc periclitada, suenter splendur cun sulegl
Il program da las cursas da skis a San Murezzan era stretg – era quai che pertutga il temp. Pervia da la naiv nova ch'i ha dà la notg da gievgia sin venderdi, e pervia da la tschajera ch'era sin la pista venderdi la damaun, n'era la partenza per l’emprima cursa rapida betg uschè segira. Suenter ch'ils organisaturs han dentant bittà ora la naiv nova e prendì pli bass la partenza han las skiunzas pudì ir a la partenza. Las cursas da sonda e dumengia han alura pudì vegnir manadas atras cun fina bell'aura.
Il fenomen Sofia Goggia
La skiunza taliana è vegnida segunda tar l’emprima cursa rapida a San Murezzan. Durant quella cursa ha ella dentant rut il maun. Perquai ha Sofia Goggia fatg il viadi a Milaun per l’operaziun. Be in di pli tard era ella puspè a la partenza da la segunda cursa rapida a San Murezzan ed ha gudagnà quella. Sper il maun rut da Sofia Goggia n'haja betg dà pli gronds incaps, din ils responsabels. Tut saja gartegià uschia sco quai ch'ils organisaturs han sperà.