Siglir tar il cuntegn

Header

Legenda: Las cursas da la cuppa mundiala da skis ils 11 e 12 da december a San Murezzan èn periclitadas. Keystone
cuntegn

Cuppa mundiala Cursas a San Murezzan periclitadas

La stagiun da la cuppa mundiala da skis ha strusch cumenzà e gia penda quella vid in fil – la raschun è corona. La pandemia fa quitads, quai en ina stagiun cun il punct culminant, ils gieus olimpics d’enviern a Beijing en China.

En vista a la nova stagiun da skis èn las speranzas stadas grondas che tut vegnia puspè bun cun festas e classichers da skis, cun fans e schampagn. Ma in enviern normal na datti danovamain betg. Tenor Walter Reusser, il directur alpin tar Swiss Ski, saja tut anc pli cumplitgà ch’avant in onn. Ils cas da corona creschan da di per di, i dat novas mutaziuns, adina dapli restricziuns, quarantinas e virivaris cun atletas ed atlets betg virolads. Betg las meglras premissas per ina buna stagiun olimpica da skis.

Tge capita cun las cursas da San Murezzan?

Il BAG, l’Uffizi federal da sanadad, ha mess da nov il Canada sin la glista da risico da pajais nua che la varianta omicron vegn avant. Vul dir: persunas che vegnan da quest pajais en Svizra èn obligadas da mussar in test da Covid-19 negativ e ston silsuenter ir per 10 dis en quarantina.

Ma co duai quai ir? Il mument èn las skiunzas da la cuppa mundiala a Lake Louise per far là la fin d’emna las emprimas cursas spertas en questa stagiun. Il viadi enavos en Svizra è planisà il cumenzament da l’emna proxima. E gia la fin d’emna dals 11 e 12 da december stattan sin il program las cursas da la cuppa mundiala, dus super-G’s, a San Murezzan. Ina quarantina da 10 dis n’è uschia betg pussibla per Lara Gut, Corinne Suter e collegas.

Lubientscha speziala

Las cursas da skis a San Murezzan pendan pia vid in fil. Las reglas dal BAG valan, almain il mument, per tuts. Tuttina vulan ils organisaturs dumandar il chantun per ina lubientscha speziala per las atletas ed ils atlets. Lur argument: Quels sa chattan en ina zona serrada, nua ch'i n'han betg contact cun persunas ordaifer il circus da skis, ha declerà Beat Tschuor a l'agentura da novitads Keystone-SDA.

Cifras en il Canada

Avrir la box Serrar la box

Bain noda Canada il mument stgars 2'500 cas a di sin sia populaziun da 38 milliuns persunas. Ma, ins ha gia constattà la nova varianta omricon en il pajais. Perquai è Canada sin la glista da ristg.

Tschuor, il scheftrenader da las dunnas da Swiss Ski ha manegià ch'il donn dad ina desditga da las cursas a San Murezzan fissia «enorm», malgrà assicuranza. Da vart da la FIS èsi dentant d'udir ch'il stritgar fiss en vista a las ulteriuras cursas en Europa in minimar il donn.

Swiss Olympic pretenda midada da reglas

Swis Olympic pretenda entant che las reglas da quarantinavegnian adattadas per il sport. Sche sportistas e sportists d'elita stoppian mintga giada ir en quarantina cura ch'els turnan dad ina cursa, a possian els betg pli far lur mastergn.

Tenor il BAG è in'autorisaziun speziala per ils atlets e las atletas pussaivla. La dumonda stoppia dentant anc vegnir analisada pli bain.

Tgi è virolà – tgi betg

In ulteriur problem che fa mal il venter è la virola cunter corona. Intgins skiunzs n’èn anc adina betg virolads, tranter auter Ralph Weber ed Urs Kryenbühl ch’èn sa decidids encunter la virola suenter esser stads infectads cun il Coronavirus. Ord il ravugl dal management da Carlo Janka è sco i para er il skiunz da Sursaissa encunter ina tala virola. Carlo Janka n’ha dentant betg vulì prender posiziun en chaussa. En mintga cas ha quest trio mancà a las cursas a Lake Louise en il Canada. Durant che Weber e Kryenbühl pon uss ir a la partenza a las cursas da Beaver Creek en il stadi da Colorado n'ha Janka gnanc fatg il viadi vi sur mar, principalmain pervia da ses problems cun il dies.

Plinavant hai dà la fin d’emna passada a las cursas dals umens a Lake Louise ina confusiun pertutgant tests da corona positivs. Da la FIS hai gì num che 10 skiunzs sajan vegnids testads positiv sin il virus. Tar in segund test il di suenter era dentant be in cas positiv – in virivari.

Sin la cuppa mundiala da skis spetga in dir temp e quella pudess dar ensemen sco ina chasa da cartas, na sa meglierescha la situaziun betg tant pli spert. Il fatg è che l’emprim eveniment grond quest enviern en Svizra è gia vegnì annullà, l’Universiada da students ch’avess gì da cumenzar ils 11 da december a Lucerna.

audio
Per tadlar curt e cumpact
01:11 min, RTR Audio dals 01.12.2021.
laschar ir. Durada: 01:11 minutas.

RTR actualitad 17:00

Artitgels legids il pli savens

Scrollar a sanestra Scrollar a dretga