Niklas Hartweg ha procurà a Lai per il meglier resultat svizzer en il sprint, l'emprima cursa da la cuppa mundiala dals umens. Il giuven da 23 onns, che n'èra betg stà a la partenza la davosa fin d'emna a Hochfilzen en l'Austria perquai ch'el è stà malsaun, è currì en il sprint sur 10 kilometers sin il 11avel plaz. Per Hartweg fiss anc stà pussibel in meglier resultat, dentant ha il meglier atlet dals U25 da la stagiun passada fatg in sbagl da sajettar sin pes.
Sin il victur dal di, il Tudestg Benedikt Doll, ha Hartweg pers 1:12 minutas. Il campiun mundial dal sprint dal 2017 n'ha fatg nagins sbagls da sajettar ed ha uschia procurà cun ses success a Lai gia per la terza victoria d'in Tudestg quest enviern. Il Norvegiais Johannes Thingnes Bö ed il cumpatriot da Doll, Philipp Nawrath, ch'aveva gudagnà surprendentamain il sprint ad Östersund, han cumplettà il podest cun mintgamai in sbagl da sajettar.
Stalder cun ina cursa d'emblidar
Ina pitschna trumpada hai dà per Sebastian Stalder ch'ha tar sia cursa da chasa stuì magunar ses mender resultat en questa stagiun. Stalder ha fatg dus sbagls da sajettar ed er en la loipa n'èsi betg ì sco giavischà. Uschia ha il Turitgais stuì sa cuntentar be cun il 42avel plaz.
Joscha Burkhalter è sa classà sco 35avel anc avant Stalder ed ha uschia er pudì sa qualifitgar per la cursa da persecuziun da la sonda. Jeremy Finello ha perencunter fatg tschintg sbagls al stan da tir ed ha uschia manchentà ils top 60.
