Siglir tar il cuntegn

Header

biatlon
Legenda: Lai è stà durant quatter dis il Mekka dal sport da biatlon. Keystone
cuntegn

Cuppa mundiala da biatlon Lai La premiera è daventada in festival

L’emprima cuppa mundiala da biatlon da la IBU en Svizra è reussida. Ed ils maletgs dals davos dis fan gust sin ils campiunadis mundials da biatlon il favrer 2025 en l’Arena da biatlon a Lai.

Tut en tut han visità 22’500 aspectaturas ed aspectaturs l’Arena da biatlon durant ils quatter dis da cursa. Cunzunt la fin d’emna ha carmalà blera glieud al lieu. E grazia a la fina bell’aura e cursas spectacularas è questa cuppa mundiala daventada ina gronda festa da sport.

audio
Facit e bilantscha da las emprimas cursas da la cuppa mundiala a Lai
ord Actualitad dals 18.12.2023. Maletg: Keystone
laschar ir. Durada: 6 minutas 16 Secundas.

Ils dus gronds protagonists ord vista sportiva èn stads la Franzosa Justine Braisaz-Bouchet ch’ha gudagnà tut las trais cursas da las dunnas ed il Norvegiais Johannes Thingnes Bö ch’è stà tant en la cursa da persecuziun sco er en la cursa cun partenza en massa sisum il podest. Plinavant è il dominatur da la scena da biatlon vegnì segund en il sprint.

audio
Guido Mittner cun in facit davart la logistica e l'infrastructura
ord Actualitad dals 18.12.2023. Maletg: RTR
laschar ir. Durada: 4 minutas 22 Secundas.

Tschients voluntaris en servetsch

Al comité d’organisaziun èsi reussì da manar atras questa premiera a Lai sin aut livel. «Da princip essan nus fitg cuntents», di Jürg Capol, il CEO da la cuppa mundiala e dal campiunadi mundial il 2025. Tut n’haja però betg funcziunà sco giavischà, prezisescha Capol. Ussa saja impurtant d’analisar tut quai ed adattar ils concepts en vista al campiunadi mundial. Il comité d’organisaziun ha er survegnì in immens sustegn dals radund 600 voluntaris.

Bilantscha positiva da la hotellaria

Era l'hotellaria tira in bilantscha positiva. «Quai è la meglra reclama per vacanzas d'enviern: per Lai, per il sport da biatlon, ma era per il Grischun u la Svizra sco pajais da vacanzas per mussar quant bel che nus avain en las muntognas cun las grondiusas relaziuns da naiv. Meglier na va quai betg per cumenzar la stagiun» ha ditg il president Hotelleriesuisse e hotelier Schweizerhof Lai.

Sin ils campiunadis mundials dal 2025 sa legra Züllig. Ina sfida saja da chattar la ballantscha tranter ils desideris d’ina occurrenza gronda, e las vacanzas da sport dals turitgais. Tut quai saja numnadamain il favrer e pretendia ina buna planisaziun. Perquai ch’ins stoppia era guardar sin ils giavischs dals giasts regulars, che vegnian in onn pli tard puspè.

video
Bilantscha positiva dal comité d'organisaziun
Or da Telesguard dals 18.12.2023.
laschar ir. Durada: 3 minutas 16 Secundas.

Da Federer fin Candinas

Las cursas da biatlon han era carmalà blera prominenza a Lai. Tranter auter è l’anteriur giugader da tennis Roger Federer, il mountainbiker Nino Schurter u ils lutgaders Armon Orlik e Christian Stucki stads preschents. Ma era bleras persunas or da la politica han visità quest spectacul da biatlon, tranter els per exempel il cusseglier naziunal Martin Candinas.

RTR actualitad 17:00

Artitgels legids il pli savens