Ils dus ciclists da Tersnaus èn en ils top 6 da la cursa da cross country en l'Andorra. Il campiun mundial Nino Schurter è ì sin il podest sco terz e Vital Albin ha realisà sco 6avel il meglier resultat da sia carriera en questa disciplina. Gudagnà la cursa ha – sco avant in'emna a Lai – il Talian Luca Braidot. Segund è il Spagnol Daniel Valero Serrano.
Cross-country da las dunnas
La Svizra Ramona Forchini dumagnà in plaz sin il podest. En la cursa da cross country è ella vegnida terza. En sia carriera en la cuppa mundiala n'ha ella anc mai dumagnà tranter las meglras 10. A moda suverana gudagnà ha l'Ollandaisa Anne Terprstra avant l'Austriacca Mona Mitterwallner.
Duas victorias per la Svizra il venderdi
L'emprim ha la Alessandra Keller gudagnà la cursa da Short Track per las dunnas. Suenter ha Mathias Flückiger era gudagnà per ils umens.
Lindea Indergand, in'ulteriura Svizra, è crudada enavos sin il quart plaz, quai pir en l'ultima runda. Ed era il Svizzer Thomas Litscher è vegnì quart. Il Grischun, Nino Schurter, è vegnì 15avel.