Siglir tar il cuntegn

Header

cuntegn

Cuppa mundiala da ski alpin San Murezzan è pront per las cursas da las dunnas

Las emprimas cursas da skis en las disciplinas spertas han lieu tradiziunalmain l’entschatta da december a San Murezzan. Sin la Corviglia sur San Murezzan as mesiran las meglras skiunzas dal mund en il Super G ed en la cursa aval.

Pervia da l’annullaziun da las cursas rapidas a Zermatt han lieu las emprimas cursas en las disciplinas spertas da questa stagiun a San Murezzan. 10 skiunzas svizras èn nominadas per ir a la partenza da las cursas en Engiadin'Ota, tranter quellas er ils trumfs Jasmine Flury, Corinne Suter e Lara Gut-Behrami. Betg da la partida tar las cursas a chasa è Stephanie Jenal da Samignun. Ella s'è ferida durant il trenament vi dad in schanugl. 

audio
Cuppa mundiala San Murezzan – il stan da las preparaziuns
ord Actualitad dals 06.12.2023. Maletg: RTR
laschar ir. Durada: 6 minutas 56 Secundas.

400 voluntaris procuran per cundiziuns perfetgas

Las cursas da skis da la cuppa mundiala a San Murezzan èn il tun da partenza en la stagiun d’enviern da la Engiadin'Ota. Il lieu da cura ha in'enorma experientscha en connex cun cursas da la cuppa mundiala. Las skiunzas èn gia idas numerusas giadas a la partenza da questas cursas sin la Corviglia sur San Murezzan. Uschia dispona l’organisaziun era dad in'enorma experientscha sin e sper las pistas. Radund 400 voluntaris s’engaschan per che las skiunzas chattian a San Murezzan las meglras cundiziuns pussaivlas.

Preparaziun da las pistas ha cumenzà baud, uss datti anc la davosa glimada

Gia l’october ha ins cumenzà sin la Corviglia cun la preparaziun da las pistas per las cursas da la cuppa mundiala. La basa da mintga pista da cursa è ina cuverta solida da naiv tecnica, vul dir naiv artifiziala. Sin quella basa vegn alura lavurada si la pista per las cursas da la cuppa mundiala da skis. La naiv dals davos dis han ins stumplà or da la pista ed er allontanà la naiv or da las zonas nua che las skiunzas pudessan crudar. Uschia è ins puspè sin la basa ch’è vegnida installada gia l'october ed il november. Las temperaturas fraidas gidan vinavant che la basa restia cumpacta, uschia sco che las curriduras han gugent quai.

RTR actualitad 12:00

Artitgels legids il pli savens