La cuppa mundiala da skis cun las emprimas cursas sveltas da la stagiun sto Mauro Caviezel guardar a chasa en la televisiun. El ha bain fin l'ultim gì la speranza da pudair parter a Lake Louise ed a Beaver Creek. Ses skis aveva el spedì vi sur mar. En cas ch'i vess da grategiar e l'ultim puzzle ch'i dovria chattass la via en ses tscharvè. Dapi 10 mais, dapi ses crash en il trenament a Garmisch cun la greva squassada dal tscharvè, fa Mauro Caviezel terapias tar divers top-spezialists (neurolog, optometrist, terapeut manual).
«Stan oz è mes return intschert»
Tras ils problems cun la vesida ed il vesair dubel en intginas posiziuns sin ils skis, vegn Mauro Caviezel en ina situaziun da stress e bler pli baud a las limitas. Bler memia privlus e betg da responsar dad ir a la partenza da las pli grevas e spertas cursas dal mund. Il spezialist da speed e victur da la culla da cristal en sia disciplina da parada, il Super-G (stagiun 2019/20) ha gì da superar bleras blessuras en sia carriera. El è adina restà optimist. Mauro Caviezel pensa era che questa giada vegnia tut puspè bun. Ma la gronda dumonda è cura. Nagut sa laschia planisar. Sia gronda finamira saja bain da turnar en la cuppa mundiala da skis, ma sch'el guardia enavos sin ils ultims mais, na saja ses comeback betg realistic il proxim temp. Ed era ils gieus olimpics a Peking ha el mess lunsch davosvart en ses chau. Emprima finamira saja da vegnir saun.