A Leogang en l'Austria gudogna Lars Forster la cursa da cross-country en la cuppa mundiala da mountainbike. Il Svizzer realisescha uschia sia segunda victoria en la cuppa mundiala. L'atlet da 29 onns gudogna avant Luca Schwarzbauer da la Germania. Il sulet auter Svizzer en ils top 10 è Mathias Flückiger sin plaz tschintg. Nino Schurter sa tschenta sin plaz 21.
Tar las dunnas sa tschenta Sina Frei sco meglra Svizra sin plazza sis. La victoria va a l'Ollandaisa Puck Pieterse. Era Jolanda Neff dumogna en las top 10. Cun la 10avla plazza realisescha ella il meglier resultat da la stagiun.
Trumpada per ils Svizzers en il short track
Terrada per ils mountainbikers svizzers en la cursa da short track da la cuppa mundiala a Leogang en l'Austria. Meglier Svizzer è stà Nino Schurter sco 17avel. Vital Albin, l'auter mountainbiker da Tersnaus ha terminà la cursa sin plazza 27. Avant in onn era Albin anc vegnì terz en questa cursa, quai tar la victoria da Mathias Flückiger ch'ha stuì sa cuntentar quest onn cun il 24avel plaz. Gudagnà la cursa, quai per l'emprima giada en il short track, ha il Franzos Jordan Sarrou.
Er tar las dunnas n'han las Svizras betg pudì persvader. Meglra Svizra è stada Alessandra Keller sco 11avla. Gudagnà ha la Franzosa e campiunessa mundiala Pauline Ferrand-Prévot.
