Gia per la novavla giada ha la cuppa mundiala da snowboard alpin fatg fermativa a Scuol. Sin la costa nua ch'il campiun olimpic Nevin Galmarini ha emprendì il sport da snowboard n'ha l’equipa svizra betg pudì cumbatter per plazzas da podest.
L’Italia – il mument la meglra naziun da snowboard alpin
Gist ils emprims quatter atlets dal classament general da la cuppa mundiala da snowboard alpin derivan da l’Italia. Uschia er il victur da las cursas a Scuol, Roland Fischnaller. En il quart final ha Fischnaller l’emprim battì Dario Caviezel, alura en il mezfinal Radoslav Yankov ed en il final ses cumpatriot Mirko Felicetti. Roland Fischnaller era pia a Scuol il pli spert. Meglier svizzer e daventà Dario Caviezel sco tschintgavel.
Tar las dunnas era Ramona Hofmeister da la Germania la pli sperta, e Julie Zogg sco dieschavla la meglra Svizra.
Ricarda Hauser unica indigena
Gia per la terza giada ha l’indigena Ricarda Hauser pudì ir a la partenza tar las cursas da chasa a Scuol. La giuvna indigena è partida bain en la qualificaziun per las cursas a Scuol. Suenter l’emprima cursa da qualificaziun era ella anc sin ina plazza da qualificaziun per las cursas da final. Durant la segunda cursa da qualificaziun è Ricarda Hauser dentant crudada, ella ha pers uschia bler temp ed ha manchentà il final.
