HCD – Sparta Prag 2:9
Nagina schanza per il Club da hockey da Tavau encunter Sparta Prag. Durant l’emprim terz era la partida anc egualisada. I steva be 1:2. En il terz d’amez ha Sparta lura dentant fatg la differenza. L’equipa ha fatg quatter gols, ed ulteriurs trais gols lura anc en il davos terz al resultat final da 2 a 9. Sparta è uschia qualifitgà directamain per il mezfinal. Il Club da hockey da Tavau ha dad ir la via sur il pre mezfinal encunter Helsinki.
Il Club da hockey da Tavau, dentant era Sparta Prag han gudagnà lur emprimas partidas da la Cuppa Spengler encunter il Team Canada. Omaduas equipas han persvadì encunter il defensur dal titel e champiun da record.
Ambri-Piotta – IFK Helsinki 7:3: Ina festa da gols
Ambri cumenza bain, gia en la 6avla minuta sajetta Pestoni l'emprim gol per ils Tessinais. En la 11avla minuta engrondescha McMillan l'avantatg. Ambri maina suenter l'emprim terz cun 2:0.
En la 23avla minuta gartegia Chlapik per Ambri, ma Helsinki po sa revanschar 43 secundas suenter e scursanir a 3:1 cun in gol da Motin. Ed ils Finlandais han gustà sang, Rantakri scursanescha tar 3:2. Il gieu resta tensiv. Ambri sa revegn spert e Kneubuehler engrondescha puspè l'avantatg – 4:2.
L'ultim terz cumenza intensiv. Gist en la 42avla minuta gartegia Spacek per Ambri (5:2). Ma Helsinki na lascha betg pender il chau: gia en la 44avla minuta scursanescha Nättinen per ils Finlandais a 5:3. Sis minutas avant la fin gartegia Heim per ils Tessinais, l'avantatg munta puspè a trais gols. Ma pausa na fa Ambri betg: Kneubuehler gartegia anc ina giada en il gol da Helsinki, 7:3 en la 57avla minuta.
Ambri cumenza bain il turnier
L’equipa da la Leventina ha persvas durant l’emprima partida da la Cuppa Spengler. Ambri ha gudagnà encunter il favurit dad Örebro. Perquai han ils Tessinais gì liber il segund di dal turnier. Quel han els passentà cun lura famiglias sin il glatsch sper la halla da glatsch da Tavau. Il di da la gronda famiglia dad Ambri-Piotta è impurtant per ils giugaders. Ensemen cun ils confamigliars pon ins tancar forza per las partidas che seguan. Uschia era per il gieu encunter Helsinki ch'ha pers l’emprima partida cunter Örebro.