La NCAA Division è la pli auta liga en il hockey sin glatsch da College en ils Stadis Unids. Ella cumpiglia 64 teams ch'èn organisads en 6 conferenzas. Mintgina cun in'atgna stagiun da hockey e playoffs.
Il hockey sin glatsch da College vala sco tgina da talents per la NHL, la pli impurtanta liga da hockey dal mund. Var 85% dals giugadurs en la National Hockey League derivan da la NCAA, uschia ils organisaturs da la Cuppa Spengler a Tavau. En quella divisiun da College na giogan betg be hockeyans americans. Ella attira numerus talents ord pajais sco il Canada, la Svezia, Finlanda, Tschechia, Germania ed era da la Svizra.
Premiera sin glatsch europeic – a Tavau
L'equipa US Collegiate Selects, che ha premiera a la Cuppa Spengler 2025, vegn ad esser be pauc pli giuvna che l'equipa naziunala dals Stadis Unids ch'ha dacurt gudagnà il titel da campiuns mundials a Stockholm. Numerus giugadurs en la NCAA èn sur la tipica vegliadetgna da College. Ils blers han avant il College passentà plirs onns en ligas da juniors per sa sviluppar. Ed uschia cumenzan ils blers lur studi pir cun passa 20 onns.
Fans e visitaders da la Cuppa Spengler 2025 (26 fin 31 da december) dastgan sa legrar sin ina giuvna e talentada selecziun/equipa, ch'ins ha anc mai vesì sin il glatsch en Europa, uschia Marc Gianola, il president dal comité d'organisaziun da la Cuppa Spengler.
L'US Collegiate Selects fa uschia cumpletta la glista dals participants al turnier da tradiziun tranter Nadal e Bumaun en ils culms dal Grischun. Sper il HC Tavau ed ils defensurs dal titel da Fribourg-Gottéron èn era Helsinki, Sparta Prag ed il Team Canada en acziun e cumbattan per titel e buccal.