Il 2011 è stà la davosa giada ch'il Club da Hockey da Tavau ha pudì gudagnar la Cuppa Spengler. Oz a mezdi spetga puspè ina giada la chaschun dad ir per il buccal per la 16avla giada – ed uschia egalisar il record dal Team Canada. L'adversari è Pardubice da la Tschechia.
En mintga partida ha il HCD sajettà quatter gols
Cun sa qualifitgar a moda directa per ils mezfinals ha il HCD pudì spargnar in pau forzas. Quai è gartegià cun las victorias da 4:1 en l'emprima partida cunter Frölunda, e da 4:3 en la segunda partida cunter il Team Canada. Suenter il di da pausa il venderdi ha Tavau puspè dà ier cunter Frölunda, en il mezfinal. E questa partida è stada contestada. Duas giadas è Tavau stà en avantatg en il temp regular, ed ina giada Frölunda. En la prolungaziun è tut lura ì svelt, al 4:3 per il HCD.
Premiera per Pardubice
Pardubice suonda al HCD en il final da la Cuppa Spengler. Als Tschecs èsi gartegià da volver ina partida turbulenta cunter il Team Canada en las ultimas quatter minutas dad in 1:3 ad in 4:3. Il gol decisiv per la squadra tscheca è crudà 39 secundas avant la fin da la partida.
Sin la via en il final han ils Tschecs battì il defensur dal titel Ambri ed er KalPa Kuopia en la fasa da gruppas, uschia ch’els èn er sa qualifitgads a moda directa per il mezfinal en il qual els han battì ils Canadais in extremis.
Il club tschec è per la terza giada suenter il 1987 ed il 2007 puspè a la Cuppa Spengler. Sco il turnier da tradiziun a Tavau festivescha er Pardubice quest onn ses giubileum da 100 onns.
