Delémont ha procurà per ina sensaziun en la segunda runda da la cuppa svizra. Il club da la Promotion League ha battì Son Gagl da la Super League a chasa cun 2:1. Suenter GC ed Yverdon è Son Gagl la terza equipa da la Super League che croda ora en ils sedeschavel-finals.
Plinavant ha Brühl Son Gagl pers cunter Lausanne-Sport cun 0:4. Tuggen ha pers cunter Turitg cun 0:3. Aarau ha pers la partida cunter Winterthur cun 1:2 e Bellinzona ha gudagnà cunter Schaffusa cun 3:1 suenter prolungaziun.
Er per ils Grasshoppers è la Cuppa Svizra gia a fin suenter la segunda runda: Ils Turitgais han pers ordaifer cunter la squadra relegada da Sion gist cun 0:3. Gudagnà piz a cup lur duels cunter clubs da la Challenge League han percunter ils dus ulteriurs clubs da la Super League: Ils Young Boys han gudagnà ordaifer cunter Xamax cun 1 :0. Il sulet gol da la partida è pir crudà en la 90avla minuta. E: Stade-Lausanne ha battì Wil ordaifer cun 4:3 suenter sajettar penaltis.
