Il team svizzer da curling en il mixed-dubel è sa qualifitgà per ils gieus olimpics ch’èn il 2022 a Peking. Al campiunadi mundial ch’è actualmain ad Aberdeen, ha il duo svizzer gudagnà l’otgavel da nov gieus en la round robin cunter l’Estonia.
Cunquai èsi gia cler che il duo cun Jenny Perret e Martin Rios terminescha la Round Robin sin il terz plaz da la gruppa, tge che tanscha per la qualificaziun per ils gieus olimpics. En ils quartfinals dal campiunadi mundial frunta il duo probablamain u sin il Canada u l’Italia.
Il duo Perret / Rios aveva gudagnà argient als gieus olimpics dal 2018 a Pyeongchang. Il 2017 èn els stads campiuns mundials.
