Sco tar ils umens era er la cursa da las dunnas a Silvaplauna ina chaussa per las atletas da la Russia e da la Norvegia. Sumegliant a la cursa dals umens ha era tar las dunnas Yulia Stupak dominà la concurrenza. Er ella è vegnida cun avantatg en l’arrivada uschia che i n’ha betg dà in sprint final. Ella gudogna la cursa da 10km en il stil classic cun 7 secundas avantatg avant Heidi Weng. Terza vegn Ebba Andersson da la Svezia.
Fähndrich meglra svizra sin plazza 19
Duas passlunghistas svizras eran era a la partenza da la cursa da las dunnas. La meglra è stada Nadine Fähndrich. Ella perda 1 minuta e diesch secundas e vegn 19avla.
Laurien van der Graaff da Tavau terminescha la cursa sin plazza 48. Damaun dumengia spetga gia baud a partir da las 08:15 uras la cursa da distanza sur 30km. Er las dunnas partan en il modus da persecuziun. Quai vul dir, ch'ellas san partir cun il retard dad oz a la cursa.
Therese Johaug betg a la partenza
Pir oz da mezdi ha la Norvegiaisa Therese Johaug decidì da betg ir a la partenza da las davosas duas cursas da la stagiun. Tar ils campiunadis mundials ad Oberstdorf s'ha la gronda dominatura para inflammà la chanvella. Perquai ha ella stuì dar forfait per las cursas en Engiadina.