Cursa da passlung - Victorias norvegiaisas tar la cursa La Diagonela

Era la 11avla ediziun da la cursa da passlung La Diagonela da Puntraschigna a Zuoz han dominà curriduras e curridurs norvegiais. Tar ils umens ha gudagnà Kasper Stadaas en il sprint avant Johan Hoel e Thomas Oedegaarden omadus era da la Norvegia. Meglier indigen è stà Gian Flurin Pfäffli da Puntraschigna sco 55avel. El ha duvrà per il traject 2 uras 33 minutas e 27 secundas.

audio

Gian Flurin Pfäffli meglier indigen a La Diagonela

04:00 min, ord Actualitad dals 20.01.2024. Maletg: RTR

laschar ir. Durada: 4 minutas.

1 / 3

Legenda: Curridurs a l'arrivada da La Diagonela RTR

2 / 3

Legenda: Cuntents dad esser en l'arrivada RTR

3 / 3

Legenda: Igl e stà fraid a la cursa La Diagonela RTR

Ina victoria dubla norvegiaisa ha quai era dà tar las dunnas. Magni Smedaas ha gudagnà la cursa avant sia collega d’equipa Emelie Fleten. Terza è vegnida Kati Roivas da la Finlanda. Meglra svizra è stada Solene Faivre da La Brévine.

Victorias indigenas tar la cursa La Pachifica sur 25 km

L’anteriur campiun olimpic e campiun mundial Dario Cologna po anc adina. Cologna ha gudagnà la cursa Pachifica sur 25 kilometers. L’anteriur passlunghist da professiun ha gudagnà La Pachifica avant Francesco Manzoni da l’Italia e Curdin Räz da Segl. Toni Livers è vegnì quart, Arnaud Du Pasquier tschintgavel ed il giuven Marchet Nesa da Scuol sisavel.

Era tar las dunnas hai dà tar la cursa La Pachifica ina victoria indigena. Celia Rüegg è ida cun la plima.