La cursa da persecuziun a Kuusamo era ditg en discussiun: La damaun eran las temperaturas anc sut ils lubids -20 grads. Grazia al sulegl han ins lura tuttina pudì manar atras la cursa.
Cologna dat forfait - Bolschunow gudogna
Tar ils umens han il victur dal di avant Iivo Niskanen e l'entir team da la Norvegia desistì d'ina participaziun. Quai per tema da la sanada. Era Dario Cologna ha curt avant il start dà forfait: «Igl è simplamain memia fraid», ha el accentuà. Cun Beda Klee ha in segund Svizzer desistì da prender part a la cursa.
Prestaziun solida da Fähndrich
Tar la cursa da las dunnas sur 10 kilometers è la victura dal di avant, Frida Karlsson, partida cun in avantatg da 14 secundas sin Therese Johaug. La Norvegiaisa ha dentant gia en la mitad da la cursa pudì tschiffar Frida Karlsson. A l'arrivada ha Johaug pudì festivar cun 8 secundas avantatg sia 78avel victoria en la cuppa mundiala.
Nadine Fähndrich ha mussà ina cursa plaschaivla. Ella ha fatg bun in plaz ed è vegnì 13avla. Sin la victura ha ella pers bun 20 secundas.