Siglir tar il cuntegn

Header

Resumaziun da l'emprima cursa rapida a Kitzbühel.
Or da Sport-Clip dals 19.01.2024.
cuntegn

Cursa rapida a Kitzbühel Odermatt sin il podest tar la show da Sarrazin

video
Sco adina – Cyprien Sarrazin metta tut sin ina carta
Or da Sport-Clip dals 19.01.2024.
laschar ir. Durada: 2 minutas 4 Secundas.

Il Franzos Cyprien Sarrazin ha engulà a tuts la show a Kitzbühel, er al dubel victur da Wengen Marco Odermatt. Cun il numer 10 è Odermatt ì en avantatg, dentant curt suenter ha gia il Talian Florian Schieder battì il Svizzer gì dal tron. Anc per il nair da l'ungla è la finala stà il Franzos Cyprien Sarrazin che veva gia triumfà a la cursa rapida a Bormio e ch'era vegnì al Lauberhorn duas giadas segund.

video
Odermatt mussa ina buna, dentant betg ina cursa perfetga
Or da Sport-Clip dals 19.01.2024.
laschar ir. Durada: 2 minutas 12 Secundas.

Il podest:

  1. Cyprien Sarrazin (FRA) 1:55,75 minutas
  2. Florian Schieder (ITA) +0,05 sec.
  3. Marco Odermatt (SUI) +0,34 sec.
video
Odermatt: «Oz ha mancà in pertschient»
Or da Sport-Clip dals 19.01.2024.
laschar ir. Durada: 1 minuta 17 Secundas.

Durant che Marco Odermatt ha fatg per la segunda giada a Kitzbühel il pass sin il podest suenter ses segund plaz il 2022 davos Beat Feuz ha er Florian Schieder demonstrà ch'el è in vair expert sin la Streif. Gia avant in onn er'il Talian vegnì segund, quai cun il numer 43. Quai èn fin oz ils sulets dus plazs da podest per Schieder.

video
Sarrazin: «Igl n'è betg stà ina cursa perfetga»
Or da Sport-Clip dals 19.01.2024.
laschar ir. Durada: 1 minuta 53 Secundas.

Ils resultats dals ulteriurs Svizzers:

  • 8. Justin Murisier +0,83 sec.
  • 9. Arnaud Boisset +1,11 sec.
  • 15. Stefan Rogentin +1,36 sec.
  • 20. Alexis Monney +1,59 sec.
  • 38. Franjo von Allmen +2,37 sec.
  • 43. Josua Mettler +2,77 sec.
  • 43. Lars Rösti +2,77 sec.
  • Niels Hintermann OUT
  • Ralph Weber OUT

Per la pli gronda surpraisa ord vista svizra ha Arnaud Boisset procurà. Il skiunz da 25 onns è vegnì tar sia premiera a Kitzbühel gist 9avel e realisescha uschia gia in top resultat en sia pir quarta cursa da la cuppa mundiala. Il Vallesan ha stuì parter gist duas giadas. L'emprima giada è el vegnì franà perquai ch'in gidanter era cupitgà sin pista. Ina buna mes'ura pli tard ha Boisset mussà sia meglra cursa da la carriera fin oz. Enfin il quart temp intermediar er'el schizunt a la testa dal classament. Pir sin la davosa part, cunzunt tar la traversa avant l'arrivada, ha el anc pers temp e crudà davos il segund meglier svizzer Justin Murisier.

video
La cursa sensaziunala dal Vallesan Arnaud Boisset
Or da Sport-Clip dals 19.01.2024.
laschar ir. Durada: 2 minutas 23 Secundas.

Il Grischun Stefan Rogentin ha mussà ina prestaziun solida sin la Streif. Il skiunz da Lai è partì cun il numer 1 e la finala anc pudì sa classar sut ils top 15.

Ulteriura trumpada per ils Austriacs

Betg ì sco giavischà èsi danovamain als Austriacs che spetgan anc adina sin l'emprim plaz da podest en questa stagiun en la cursa rapida. Vincent Kriechmayr, il victur dal 2021 e 2023 a Kitzbühel, è vegnì sco meglier austriac 7avel. Il segund meglier austriac è stà Otmar Striedinger sco be 21avel.

video
L'Austriac Daniel Hemetsberger procura gia cun il numer 2 per in'emprima snavur
Or da Sport-Clip dals 19.01.2024.
laschar ir. Durada: 44 Secundas.

Schanza da far revantscha survegnan ils Austriacs gia la sonda, lura stat sin il program la segunda cursa rapida da Kitzbühel, la vaira cursa rapida dal Hahnenkamm sin la legendara Streif. Partenza è las 11:30 uras. La dumengia spetga lura anc in slalom sin il Ganslernhang.

RTR novitads 14:00

Artitgels legids il pli savens