Per Marco Odermatt n'èsi betg mo l'emprim titel da campiun mundial, mabain er gist l'emprima medaglia a campiunadis mundials e l'emprima victoria insumma en ina cursa rapida. En questa stagiun er el stà quatter giadas sin il podest en questa disciplina, dentant mai il pli sisum. Sper il titel da campiun olimpic en il slalom gigant avant in onn a Peking e la victoria en la cuppa mundiala generala la stagiun passada è quai il pli grond success da sia carriera.
Il podest da la cursa rapida dals umens:
- Marco Odermatt (SUI) 1:47.05
- Aleksander Kilde (NOR) +0.48 secundas
- Cameron Alexander (CAN) +0.89 secundas
Marco Odermatt ha mussà ina cursa sensaziunala e senza in sulet sbagl. El è stà en quasi tut ils secturs il pli svelt. Uschia ha Odermatt er pudì far revantscha per il super-G. En questa cursa d'avant trais dis nua ch'el valeva sco grond favurit aveva il supertalent da la Svizra Centrala stuì sa cuntentar cun il quart plaz,
Puspè argient per Kilde
La segunda medaglia d'argient a quests campiunadis mundials a Courchevel Méribel gudogna Aleksander Aamodt Kilde. Il Norvegiais aveva gudagnà en questa stagiun 5 dad 8 cursas rapidas e valeva sco il grond favurit. Ma gist en la pli impurtant cursa da la stagiun ha el pers bunamain ina mesa secunda sin ses pli grond concurrent en la cuppa mundiala da skis.
Ulteriura medaglia per ils «crazy canucks»
Per ina surpraisa ha Cameron Alexander procurà. Il Canadais ha pers strusch ina secunda sin Marco Odermatt, quai ch'ha la finala tanschì per bronz. Manchentà quella medaglia be per 4 tschientavels ha l'Austriac Marco Schwarz ch'ha absolvì pir sia segunda cursa rapida da la carriera. Sia premiera aveva il spezialist da slalom gì a Wengen.
Solid, dentant betg dapli
Betg pudì persvader dal tut han ils ulteriurs svizzers. Niels Hintermann ch'aveva persvadì en ils trenaments e che siemiava d'ina medaglia ha stuì sa cuntentar cun il 12avel plaz. El parta quai plaz cun Justin Murisier ch'ha gì il medem temp. Omadus han pers 1,23 secundas sin Marco Odermatt. Il giuven Alexis Monney dal chantun Friburg ch'è vegnì tar sia premiera a campiunadis mundials ha pers 1,75 secundas. Per il skiunz da Friburg hai uschia tanschì per il 18avel plaz.
