L’Engiadin'Ota vegn ad esser l’onn 2025 il «Mecca» dal sport da freestyle. Per l’emprima giada ha lieu in campiunadi mundial da freestyle en Svizra. Durant duas emnas vegnan las regiuns da skis da la Corviglia sur San Murezzan e dal Corvatsch sur Silvaplauna ad attrair millis e millis da fans dal sport da freestyle per las differentas concurrenzas. Circa 1’300 atletas ed atlets cumbattan alura en otg differentas disciplinas per medaglias. Dal cross fin tar il slopestyle, e da las concurrenzas en la mesapipa fin tar ils sigls da big air.
Concurrenzas da test en vista al campiunadi mundial
La Federaziun internaziunala da skis (FIS) pretenda dals organisaturs da far concurrenzas da test en tut las disciplinas dals campiunadis mundials. Ils organisaturs han passa dus onns peda da manar tras questas concurrenzas. Ina part ha gia gì lieu l’enviern passà. Il rest da las concurrenzas han lieu quest enviern. La fin d’emna per exempel las cursas da la cuppa mundiala da snowboardcross e skicross sin la Corviglia.
A San Murezzan è tut pront per in spectacul da cross
Suenter diversas emnas preparaziun è il percurs da snowboardcross e da skicross sin la Corviglia pront. Gia la stad han ils organisaturs prendì en mira il terren. A maun da quai han ins construì las davosas emnas in percurs sin il Munt da San Murezzan. La pista da snowboardcross e da skicross ha stuì vegnir construida tenor tscherts criteris. Las cursas da la fin d’emna dattan alura portan lura tant a las atletas ed als atlets sco er als organisaturs infurmaziuns impurtantas per ils campiunadis mundials da l’onn proxim.
