Las cursas da la cuppa mundiala da las dunnas a San Murezzan na stattan betg gist sut ina buna staila. La stagiun passada èn las curas sin la Corviglia crudadas en l’aua pervi da memia bler naiv. Quest onn pudess la pandemia da corona – ni meglier ditg la nova mutaziun dal virus omicron – far in stritg tras il quint a las cursas da San Murezzan. Pervia da la nova varianta dal virus ha la Confederaziun schlargià la glista dals pajais, nua ch'i vala ina quarantina. Nov sin quella glista è era il Canada. Il lieu, nua che las skiunzas èn actualmain a las cursas a Lake Louise.
Sch'i vala ina quarantina, na datti naginas cursas
Pervia da las novas perscripziuns èn ils organisaturs da las cursas a San Murezzan d’in cuntin en sesidas ed al telefon. La squadra enturn il president Martin Berthod prova da chattar ina soluziun. Quella pudess esser in permiss spezial per las skiunzas da professiun, uschia ch'i fissan exclusas da la quarantina. Quai è era la speranza da la FIS, la Federaziun Internaziunala da skis. En la cuppa mundiala da skis sa chattan las skiunzas en mintga cas en ina «bubble» – en ina vaschia –, uschia che quella prettensiun fiss accumplida.
Lavurs cuntinueschan sco usità
Malgrà tut las discussiuns en connex cun la factibilitad da las cursas da la cuppa mundiala a San Murezzan, sa prepara il lieu da cura en l'Engiadin'Ota sin las cursas. Planisads èn duas cursas da speed e dus super-G’s mintgamai la sonda e la dumengia.
Per San Murezzan fissan las cursas da gronda impurtanza. Gia la stagiun passada n'ha quai betg dà il spectacul da skis sin la Corviglia. Il davos pled en chapitel ha en mintga cas la media chantunala Marina Jamnicki. Ella decida sco ultima instanza, sche las cursas a San Murezzan èn realisablas u betg.